چې د ځوى په شان ساتلئ په خپل کور راته دښمن شو
شاعر: سمیر شجاع
چې د ځوى په شان ساتلئ په خپل کور راته دښمن شو
زما خوار نصيب ته ګوره کشر ورور را ته دښمن شو
________
د دنيا برخه ئې خوښه آخرت ورته قصه شوه
د پردى کافر ملګرئ دا کم زور راته دښمن شو
________
ما غيرت وو ورښودلئ پت ناموس مى ور ګټلئ
کور وطن مى آزاد کړئ ځوى د مور راته دښمن شو
________
نه مى سر چاته ټيټ کړئ نه مى طمع د چا کړې
په زړو کاليو خوښ وم نوئ پور راته دښمن شو
________
جنګيدلئ يم په هر وخت چې غليم طمع د غلا کړه
چى د غلو سره په کور يم دا پيغور راته دښمن شو
________
نن سبا به ورښکاره کړم چې څښتن د وطن څوک دئ
دا وطن د سمير کوردئ صبر نور راته دښمن شو
________
سمیر شجاع